Ministri i Ekonomisë, Kulturës dhe Inovacionit, Blendi Gonxhja zhvilloi sot një takim me Kryepeshkopin e Kishës Ortodokse Autoqefale të Shqipërisë, Fortlumturinë e tij Joan.
Në një postim në rrjetet sociale, Gonxhja theksoi se gjatë bashkëbisedimit diskutuan mbi rëndësinë e aseteve dhe pavarësisë ekonomike për fuqizimin e kapaciteteve misionare të Kishës. Ai përmendi gjithashtu nevojën për përditësimin e bashkëpunimit në fushën e trashëgimisë kulturore, objektet monumentale, si dhe çështjet humane dhe sociale.
Ministri shprehu gatishmërinë e Ministrisë për të vazhduar dhe forcuar këtë bashkëpunim, duke vlerësuar kontributet e derisotshme të Kishës dhe duke paralajmëruar nisjen e projekteve të reja në këtë drejtim.
“Mes vrapit të përditshëm ishte një ndalesë shpirtërore me shumë vlerë,” përfundoi ministri në postimin e tij.
