Kryeministri i Kosovës, Albin Kurti mbrëmjen e djeshme ka zhvilluar një darkë pune me zyrtarin e lartë të Departamentit Amerikan të Shtetit për Çështje Evropiane, Brendan Hanrahan.
Ata gjatë darkës diskutuan për marrëdhëniet bilaterale ndërmjet Kosovës dhe Shteteve të Bashkuara në fusha si investimet, diplomacia, mbrojtja dhe integrimi euro-atlantik i Kosovës.
Kurti theksoi se Shtetet e Bashkuara mbeten një aleat i palëkundur i Kosovës. Gjithashtu shprehu mirënjohje për mbështetjen e vazhdueshme të SHBA-së në të gjitha fazat e shtetndërtimit dhe zhvillimit demokratik të vendit.
