Shtëpia e Bardhë është thellësisht e shqetësuar për veprimet e fundit të kryeministrit izraelit Benjamin Netanyahu si në Rripin e Gazës ashtu edhe në Siri. Sipas një raporti të Axios, zyrtarët e qeverisë amerikane po shprehin shqetësime serioze për qëndrimin agresiv të Izraelit dhe ndikimin që mund të ketë në stabilitetin më të gjerë të Lindjes së Mesme.
Burimet e Shtëpisë së Bardhë, të cituara nga rrjeti amerikan, e përshkruan Netanyahun si “jashtë kontrollit”, duke vënë në dukje se ai po “bombardonte pa dallim” dhe mund të minonte përpjekjet diplomatike të SHBA-së në rajon. Ka skepticizëm në rritje brenda administratës Trump për zgjedhjet e kryeministrit izraelit.
“Netanyahu duket si një fëmijë që refuzon të ndjekë rregullat. Ai po sillet në një mënyrë të pazakontë dhe të rrezikshme”, tha një zyrtar i lartë amerikan për Axios, duke folur në kushte anonimiteti.
Pavarësisht mosmarrëveshjeve, Presidenti Donald Trump mbajti një marrëdhënie të ngushtë personale me Netanyahun dhe vazhdoi ta mbështeste publikisht atë. Megjithatë, siç theksojnë burimet qeveritare, shumë nga veprimet e tij ushtarake kanë shkaktuar pakënaqësi në Shtëpinë e Bardhë, veçanërisht ato që lidhen me bllokadën e ndihmës humanitare për Gazën dhe sulmet ndaj civilëve.
Raporti nënvizon se zhvillimet në Siri, prania e Turqisë në rajon dhe bashkëpunimi strategjik SHBA-Izrael krijojnë një mjedis veçanërisht të brishtë gjeopolitik, me Shtëpinë e Bardhë që duhet të balancojë midis aleancës së saj strategjike me Izraelin dhe detyrimeve të saj ndërkombëtare për të mbrojtur paqen dhe ligjin humanitar.
