Mëngjesin e së shtunës, forcat e policisë ndërhynë në ambientet e televizionit News 24, të vendosura në ish-Uzinën e Autotraktorëve në Tiranë, duke kërkuar lirimin e menjëhershëm të godinës.
Punonjësve të redaksive iu ndalua hyrja në ndërtesë dhe u kërkua të largohen.
Sipas burimeve, ndërhyrja vjen pas kalimit të pronësisë së objektit tek kompania shtetërore KAYO, e specializuar në fushën e industrisë ushtarake.
Me vendim të qeverisë, kompania ka marrë në administrim objektin ku funksiononin prej vitesh disa redaksi mediatike.
Rreth orës 07:30, sinjali i News 24 u ndërpre, ndërsa u raportua edhe ndërprerja e energjisë elektrike në objekt.
Asociacioni i Gazetarëve të Shqipërisë ka reaguar ashpër, duke e cilësuar veprimin si një goditje ndaj lirisë së shprehjes dhe një presion të papranueshëm ndaj medias.
Ata kërkojnë ndalimin e menjëhershëm të veprimeve që cënojnë punën e gazetarëve.
Deri më tani, autoritetet shtetërore nuk kanë dhënë një deklaratë zyrtare për arsyet dhe mënyrën e ndërhyrjes.
