Partia Demokratike dhe koalicioni opozitar PD-ASHM kanë ankimuar vendimin e Komisionit Rregullator të KQZ-së për certifikimin e rezultatit përfundimtar të zgjedhjeve parlamentare të 11 majit 2025.
Në padinë e depozituar në Kolegjin Zgjedhor, opozita kërkon shpalljen të pavlefshme të vendimit të KQZ-së, duke e konsideruar procesin zgjedhor të manipuluar dhe jo të ndershëm.
Sipas opozitës zgjedhjet u shoqëruan me shkelje serioze ligjore, që cenojnë legjitimitetin e rezultatit.
Kolegji Zgjedhor ka caktuar gjyqtaren Lutfije Celami si relatore të çështjes. Vendimi përfundimtar mbi kërkesën e opozitës pritet në ditët në vijim.
