Edhe pse Gjykata Kushtetuese ka pezulluar përkohësisht dekretin për zgjedhjet e pjesshme në Tiranë, Ogerta Manastirliu ka nisur takimet si kandidate për kryetare bashkie.
Gjatë një bashkëbisedimi me punonjës të shëndetësisë, ajo foli për nevojën që Tirana të ofrojë më shumë shërbime sociale, veçanërisht për fëmijët me aftësi ndryshe.
Manastirliu tha se bashkia duhet të jetë më pranë komunitetit, duke mbështetur çerdhet, kopshtet dhe shkollat, por edhe familjet që përballen me vështirësi.
Ajo theksoi se prioritet do të jenë qendrat e specializuara për fëmijët me spektrin autik dhe rrjetet e ndihmës për ta përfshirë në jetën sociale.
Takimet e saj elektorale kanë nisur me fokusin te ndërtimi i një Tirane më sociale dhe më të ndjeshme ndaj shtresave në nevojë.
