Janë zbardhur debatet e zhvilluara në mbledhjen e Konferencës së Kryetarëve, ku kreu i grupit parlamentar të Partisë Demokratike, Gazment Bardhi, ka akuzuar kryeparlamentarin Niko Peleshi për moszbatim të procedurave në Kuvend.
Bardhi e cilësoi të paligjshme mënyrën se si u mbyll seanca plenare e datës 9 tetor, duke thënë se Kuvendi “nuk mund të drejtohet nga forcat e kartonëve”.
“Ajo që keni bërë me seancën e fundit është shkelje e rregullores dhe e Kushtetutës. Zoti Peleshi, ju keni marrë përsipër të drejtoni Kuvendin. Nëse Kuvendi drejtohet nga kryetari i grupit, na e thoni, sepse opozita nuk ka vend në një Kuvend që diktohet nga forcat e kartonëve,” tha Bardhi.
Ai shtoi se opozita “nuk do të pranojë të heshtet” dhe akuzoi mazhorancën se “merr forcën nga lidhjet me krimin e organizuar”.
Debatet në Konferencën e Kryetarëve vijnë pak ditë pas përplasjeve të ashpra në seancën plenare, që u mbyll për shkak të tensioneve mes shumicës dhe opozitës.
