Në qarkun e Fierit po rritet ndjeshëm interesi për “Paketen e Maleve”, nismë qeveritare që synon të nxisë zhvillimin e turizmit dhe agrobiznesit në zonat rurale.
Deri tani janë dorëzuar rreth 150 aplikime, ndërsa bashkitë po përfundojnë hartat e zonave ku do të lejohet zhvillimi i këtyre investimeve.
Zonat më të kërkuara janë Mallakastra, Cakrani, Frakulla, Libofsha, si edhe disa fshatra kodrinorë në Rroskovec dhe Lushnje.
Pas përfundimit të hartave, të dhënat do t’i kalojnë Këshillit të Ministrave për miratim. Në nivel kombëtar, janë bërë rreth 4 mijë aplikime, ndërsa 500 projektet e para do të përfitojnë lehtësira tatimore për 10 vjet.
