Zjarret masive që shpërthyen në Kilin qendror dhe jugor kanë shkaktuar një tragjedi të rëndë, duke marrë deri tani jetën e të paktën 20 personave dhe duke shkrumbuar mijëra hektarë pyje.
Flakët përhapeshin me shpejtësi, duke u nxitua nga temperaturat e larta dhe erërat e forta që arrinin deri në 70 km/orë, veçanërisht në rajonet e Ñuble dhe Biobío, afër 500 km në jug të Santiago.
Përballë situatës, Presidenti Gabriel Boric shpalli gjendjen e jashtëzakonshme për këto dy rajone dhe njoftoi forcimin e bashkëpunimit mes qeverisë dhe ushtrisë për të përballuar vatrat aktive të zjarrit.
“Pavarësisht se kemi mundur të mbajmë nën kontroll disa zjarre, disa ende janë shumë aktive dhe kërkojnë një luftë intensive”, tha Boric gjatë një vizite në rajonin e Ñuble.
Deri tani, rreth 85 mijë hektarë janë djegur dhe më shumë se 50 mijë njerëz janë detyruar të evakuohen. Shtëpitë e shkatërruara ende nuk janë numëruar saktë, por autoritetet lokale raportuan se në një zonë të rajonit Biobío janë shkatërruar plotësisht 253 shtëpi. Në kushte të tilla të vështira, përpjekjet e zjarrfikësve vazhdojnë, por ngadalësohen nga erërat dhe temperaturat ekstremisht të larta.
