Zv. Presidentja e Partisë së Lirisë, Erisa Xhixho, ka reaguar ashpër ndaj situatës alarmante në sistemin shëndetësor shqiptar, duke denoncuar dështimet e rënda në spitalet publike, përfshirë ndërprerjet e energjisë elektrike në reanimacion dhe mungesat kritike të pajisjeve jetike në QSUT.
Ajo theksoi se këto probleme janë pasojë e paaftësisë së qeverisë për të garantuar sigurinë e pacientëve dhe kushte minimale shëndetësore.
“Ky nuk është një incident teknik. Ky është një dështim i rëndë dhe i pafalshëm shtetëror. Në asnjë vend të botës, as në kushte lufte, nuk ndodh që reanimacioni dhe sallat kirurgjikale të mbeten pa energji. Kjo është paaftësi kriminale në menaxhimin e shërbimeve jetike.”
Ajo gjithashtu ftoi qytetarët që të marrin pjesë në protestën e 24 janarit për të kërkuar drejtësi dhe për të kërkuar ndryshime në shëndetësinë shqiptare, e cila sipas saj është keqmenaxhuar dhe ka ndikuar drejtpërdrejt në shëndetin e qytetarëve.
