Pas shfaqjes së tij në dokumentet e fundit të lidhura me Jeffrey Epstein, Elon Musk ka dhënë një reagim publik për të hedhur poshtë çdo akuzë për lidhjet e tij me financierin e dënuar.
Në një postim të bërë në rrjetet sociale, Musk theksoi se ka qenë gjithmonë një mbështetës i fuqishëm për publikimin e dosjeve të Epstein dhe ndjekjen e atyre që kanë abuzuar me fëmijë, duke i cilësuar këto akte si krime të papranueshme.
Ai shprehu gjithashtu se është i vetëdijshëm për përpjekjet e mediave dhe grupeve politike që mund të përpiqen ta sulmojnë, por ai i hodhi poshtë spekulimet mbi pjesëmarrjen e tij në festat e Epstein, si dhe lidhjet me “Lolita Express” dhe ishullin e tij.
Sipas Musk, akuzat për përfshirjen e tij janë të pabaza dhe, për më tepër, ai është i angazhuar për mbrojtjen e të pambrojturve dhe përkrahjen e fëmijëve, të cilët duhet të kenë mundësinë për të jetuar një jetë të sigurt dhe të lumtur.
“Dhimbja që kam kaluar për të mbrojtur ata që nuk mund ta bëjnë vetë është diçka që ia vlejti,” tha Musk, duke nënvizuar angazhimin e tij për të luftuar padrejtësitë dhe mbrojtjen e viktimave të abuzimit.
