Policia e Raguzës në Itali arrestoi një 43-vjeçar shqiptar, ndaj të cilit autoritetet belge kishin lëshuar një urdhër-arresti ndërkombëtar.
Sipas mediave të huaja, operacioni është pjesë e bashkëpunimit ndërkombëtar policor. Pas një informacioni nga Drejtoria Qendrore e Policisë Kriminale të Departamentit të Sigurisë Publike, hetuesit e Raguzës nisën kërkime me qëllim kapjen e tij.
Hetimet lejuan që burri, i cili ishte ‘zhdukur’ prej kohësh, të identifikohej brenda një shtëpie në Scoglitti, ku ai ishte fshehur për disa kohë.
43-vjeçari kërkohej në Belgjikë për krime të rënda që lidhen me prodhimin dhe trafikimin e narkotikëve. Pasi u lokalizua, ai u arrestua dhe pas përfundimit të procedurave formale, u transferua në burgun e Raguzës.
Burri tani mbetet në dispozicion të Autoriteteve Gjyqësore, të cilat do të duhet të vendosin për ekstradimin e tij të mundshëm në Belgjikë.
