Sot në orën 15:00, Kuvendi i Kosovës do të mblidhet për të shqyrtuar dhe miratuar pesë marrëveshje ndërkombëtare, të cilat kanë rëndësi për zhvillimin ekonomik dhe social të vendit.
Një nga marrëveshjet kryesore është ratifikimi i marrëveshjes me Bashkimin Evropian, e cila ka të bëjë me përkrahjen financiare për realizimin e reformave dhe rritjes në kuadër të Planit të Rritjes të BE-së.
Po ashtu, Kuvendi do të shqyrtojë projektligjin për financimin e politikave zhvillimore, që synon përmirësimin e efikasitetit fiskal dhe rritjen e konkurrueshmërisë. Në rend të ditës janë gjithashtu dy marrëveshje kredie me Asociacionin Ndërkombëtar për Zhvillim, për projekte të rëndësishme si forcimi i sistemit të shëndetësisë dhe përmirësimi i edukatës në fëmijërinë e hershme.
Përfundimisht, një tjetër marrëveshje ka të bëjë me Instrumentin për reforma dhe rritje për Ballkanin Perëndimor, që do të mundësojë financime për projekte zhvillimi në rajon.
Këto marrëveshje janë pjesë e përpjekjeve për të avancuar zhvillimin e Kosovës dhe për të rritur bashkëpunimin ndërkombëtar.
