Ambasada e Shteteve të Bashkuara të Amerikës në Shqipëri ka lëshuar një tjetër paralajmërim për qytetarët amerikanë që ndodhen në Shqipëri, duke i këshilluar ata të jenë të kujdesshëm dhe të shmangin lëvizjet e panevojshme në kryeqytet, pasi protesta e planifikuar nga Sali Berisha më 28 shkurt mund të eskalojë në dhunë. Sipas ambasadës, ka mundësi që situata të përshkallëzohet, ashtu siç ka ndodhur edhe herë të tjera, ndaj qytetarët amerikanë janë këshilluar të mbajnë distancë nga zonat ku do të zhvillohet protesta.
Një protestë është planifikuar të zhvillohet të shtunën, më 28 shkurt 2026, në orën 18:00. Protestuesit planifikojnë të mblidhen pranë godinës së Kryeministrisë, e cila ndodhet në Bulevardin “Dëshmorët e Kombit”, mes Sheshit “Nënë Tereza” dhe Sheshit “Skënderbej”. Protesta mund të shtrihet edhe në zona përreth.
Prani e shtuar e policisë, mbyllje rrugësh dhe ndërprerje të qarkullimit priten në orët para dhe gjatë zhvillimit të protestës. Policia e Shtetit ka paralajmëruar se protestuesit mund të bllokojnë kryqëzime në pjesë të ndryshme të qendrës së qytetit. Personeli i Ambasadës së SHBA-së është këshilluar të shmangë pjesëmarrjen apo praninë në protestë. Ndiqni mediat lokale dhe respektoni udhëzimet e autoriteteve ligjzbatuese për informacionet më të fundit.
Megjithëse protestat dhe grumbullimet e mëdha shpesh fillojnë në mënyrë paqësore, situata mund të ndryshojë shpejt. Protesta mund të zgjerohet në blloqe dhe godina qeveritare përreth, duke shkaktuar devijime, bllokime dhe mbyllje rrugësh. Udhëzimi ynë i përhershëm është të shmangni zonat e protestës. Nëse ndodheni në qytet, qëndroni vigjilentë dhe vendosni sigurinë tuaj personale si prioritet”,- njofton ambasada amerikane.
