Ministrat e jashtëm të vendeve të Grupit të 7 vendeve (G7) po i bëjnë thirrje Iranit që t’i japë fund menjëherë dhe pa kushte sulmeve të tij “të pajustifikuara” kundër vendeve të Lindjes së Mesme.
“Ne bëjmë thirrje për një ndërprerje të menjëhershme dhe pa kushte të të gjitha sulmeve të kryera nga regjimi iranian “, sipas një deklarate të përbashkët të ministrave të jashtëm të G7 (Gjermania, Kanadaja, Shtetet e Bashkuara, Franca, Italia, Japonia, Mbretëria e Bashkuar, si dhe Përfaqësuesja e Lartë e BE-së).
Irani iu përgjigj fushatës ajrore të SHBA-së dhe Izraelit, e cila filloi më 28 shkurt, duke nisur sulme kundër disa vendeve në rajon, si kundër objektivave ushtarake perëndimore, ashtu edhe kundër infrastrukturës energjetike dhe instalimeve civile.
G7 shpreh “mbështetjen e saj për partnerët tanë në Lindjen e Mesme kundër sulmeve të pajustifikuara nga Republika Islamike e Iranit dhe aleatët e saj”, thuhet në deklaratën e përbashkët.
Deri më tani, vendet që janë sulmuar nga Irani nuk janë hakmarrë ushtarakisht.
“Ne mbështesim të drejtën e vendeve që i nënshtrohen sulmeve të pajustifikuara nga Irani ose aleatët e tij për të mbrojtur territorin e tyre dhe qytetarët e tyre. Ne përsërisim mbështetjen tonë të palëkundur për sigurinë, sovranitetin dhe integritetin e tyre territorial”, shtuan ministrat e jashtëm.
Lidhur me trafikun në Ngushticën e Hormuzit, një arterie kyçe globale e naftës ku transporti detar është praktikisht i ndërprerë, G7 nënvizon “rëndësinë e ruajtjes së korridoreve detare dhe sigurisë së lundrimit, veçanërisht në Ngushticën e Hormuzit dhe të gjitha korridoret kryesore të transportit detar, si dhe sigurinë e zinxhirëve të furnizimit dhe stabilitetin e tregjeve të energjisë”.
