Presidenti turk, Recep Tayyip Erdogan, ka kritikuar ashpër konfliktin që përfshin Izraelin, SHBA-në dhe Iranin, duke e quajtur atë një “luftë të paligjshme” të nxitur nga kryeministri izraelit Benjamin Netanyahu. Në një fjalim të mbajtur pas mbledhjes së kabinetit në Ankara, Erdogan theksoi se ky konflikt ka pasojat e tij për gjithë botën dhe se 8 miliardë njerëz janë duke vuajtur për shkak të tij. Ai ka bërë thirrje për një zgjidhje diplomatike të krizës dhe ka paralajmëruar për pasojat ekonomike të mundshme në nivel global.
“25 ditët e fundit kanë treguar se, megjithëse kjo është lufta e Izraelit, bota po e paguan çmimin. Është lufta e Netanyahut për pushtet, por 8 miliardë njerëz po vuajnë pasojat,” u shpreh Erdogan, duke shtuar se “qëndrimi i paepur, maksimalist dhe radikal i Izraelit nuk duhet të lejohet të sabotojë zgjidhjet diplomatike.”
