Shitjet e makinave elektrike në Evropën kontinentale u rritën me 51% në muajin mars, për shkak të rritjes së çmimeve të benzinës dhe naftës, e cila u shkaktua nga lufta në Iran.
Sipas të dhënave të regjistruara, 224,000 automjete të reja elektrike u regjistruan në mars dhe 500,000 gjatë tremujorit të parë të vitit, një rritje prej 33.5% krahasuar me vitin e kaluar.
Analiza e të dhënave nga New AutoMotive dhe E-Mobility Europe tregon se interesi i blerësve për makinat elektrike ka pasur një rritje të ndjeshme që pas nisjes së luftës në Iran.
Vendet nordike, si Norvegjia, kanë udhëhequr në kalimin në makina elektrike, me 98% të automjeteve të reja të shitura në mars që ishin elektrike. Po ashtu, Danimarka dhe Finlanda kanë regjistruar rritje të konsiderueshme të shitjeve.
Gjermania, Franca, Spanja, Italia dhe Polonia gjithashtu kanë shënuar rritje të shitjeve të makinave elektrike prej 40% në tremujorin e parë të vitit. Italia, një nga vendet më të ngadalta për kalimin në automjete elektrike, ka raportuar një rritje të ndjeshme prej 65% në mars.
Në Francë, përmirësimi ka ardhur gjithashtu nga skemat qiraje sociale për familjet me të ardhura të ulëta, ndërsa Gjermania ka regjistruar një rritje prej 42% në shitjet e makinave elektrike, për shkak të investimeve të reja dhe ristrukturimit të industrisë.
