Presidenti ukrainas, Volodymyr Zelensky, ka theksuar nevojën për “marrëdhënie të forta” mes Kievit dhe Bratislavës gjatë një bisede telefonike me kryeministrin sllovak, Robert Fico.
“Ne kemi nevojë për marrëdhënie të forta mes vendeve tona dhe të dy jemi të interesuar për këtë”, tha Zelensky.
Ndër të tjera Zelensky theksoi se është inkurajuese që Sllovakia mbështet përpjekjen e Ukrainës për t’u anëtarësuar në Bashkimin Evropian (BE) dhe është e gatshme të ndajë përvojën e saj të anëtarësimit.
Ndërkohë, Fico kishte deklaruar se vendi i tij do të “rishqyrtojë qëndrimin e deritanishëm konstruktiv” lidhur me anëtarësimin e Ukrainës në BE nëse Kievi vazhdon të “dëmtojë interesat e Sllovakisë në furnizimin me lëndë të para strategjike”.
