Rreth 46 pasagjerë kanë zbritur deri tani nga anija turistike MV Hondius, e cila u prek nga hantavirusi, njoftoi Diana Rojas Alvarez, drejtuese e operacioneve shëndetësore në OBSH.
Procesi i zbarkimit pritet të përfundojë sot para perëndimit të diellit dhe të rifillojë nesër në mëngjes, me qëllim që të gjithë pasagjerët dhe ekuipazhi, gjithsej 146 persona, të zbresin deri të hënën në mbrëmje.
Pas evakuimit në Tenerife, anija do të udhëtojë drejt portit të saj origjinal në Holandë, me një ekip prej 30 anëtarësh ekuipazhi dhe staf mjekësor.
Maria Van Kerkhove, drejtoreshë e Departamentit të Menaxhimit të Kërcënimeve Epidemike dhe Pandemike të OBSH-së, vlerësoi koordinimin “e jashtëzakonshëm” ndërmjet OBSH-së, Spanjës dhe vendeve të tjera të përfshira në proces.
