Pas tensioneve në Lindjen e Mesme dhe shqetësimeve mbi furnizimin me karburant, çmimet e biletave të avionëve në Evropë pritet të rriten ndjeshëm. Paralajmërimi vjen nga Willie Walsh, kreu i Shoqatës Ndërkombëtare të Transportit Ajror (IATA), i cili tha se linjat ajrore nuk mund të përballojnë për një kohë të gjatë çmimet e larta të karburantit dhe se rritja e kostove për pasagjerët është “e pashmangshme”.
Problemet lidhen kryesisht me bllokimet dhe tensionet në Ngushticën e Hormuzit, një nga rrugët kryesore të furnizimit me naftë në botë.
Walsh paralajmëroi se, edhe nëse situata normalizohet shpejt, ndikimi në tregun e aviacionit mund të ndihet për muaj, madje edhe gjatë vitit të ardhshëm.
Autoritetet europiane dhe britanike sigurojnë se aktualisht nuk ka mungesë karburanti, por paralajmërimet rrisin shqetësimet për sezonin e verës, kur kërkesa për udhëtime ajrore është më e lartë.
