Një parti e ekstremit të djathtë në Zvicër ka propozuar kufizimin e popullsisë së vendit në 10 milionë në një referendum që përfundon këtë fundjavë.
Nëse miratohet, propozimi do ta detyrojë qeverinë zvicerane të marrë masa për të kufizuar popullsinë në 10 milionë deri në vitin 2050, duke vendosur kufizime të rrepta për ribashkimin familjar, lejet e qëndrimit dhe azilin nëse numri i banorëve arrin në 9.5 milionë para kësaj date.
Nëse kufiri prej 10 milionësh tejkalohet para vitit 2050, propozimi i Partisë Popullore Zvicerane (SVP) e ekstremit të djathtë do ta detyronte qeverinë të tërhiqej nga marrëveshja e lëvizjes së lirë të vendit me BE-në, duke i dhënë fund aksesit të vendit në tregun e vetëm evropian.
Rreth 27% e banorëve zviceranë nuk janë shtetas. Mbështetësit e nismës “Jo një Zvicre me 10 milionë” argumentojnë se fluksi i punëtorëve kryesisht nga BE-ja po ushtron presion të padurueshëm mbi strehimin, shkollat, transportin, mirëqenien sociale dhe vetë mënyrën zvicerane të jetesës.
Popullsia e Zvicrës është rritur shumë më shpejt se ajo e fqinjëve të saj të BE-së, raporton BBC, duke u rritur me 23% që kur marrëveshja e lëvizjes së lirë hyri në fuqi në vitin 2002. PBB-ja është rritur me rreth 24% gjatë së njëjtës periudhë, sipas shifrave të qeverisë.
Shumë veta paralajmëruan për pasoja katastrofike për ekonominë e vendit nëse votuesit do ta mbështesnin iniciativën.
Kush është kundër propozimit?
Sistemi i demokracisë së drejtpërdrejtë në Zvicër lejon që iniciativat popullore të vihen në referendum nëse ato mbledhin 100,000 mbështetës brenda 18 muajve. Referendumet, të cilat zakonisht mbahen katër herë në vit, janë një mjet i përdorur nga SVP anti-imigracion.
Qeveria me shtatë anëtarë, e cila përfshin ministra nga katër partitë më të mëdha të Zvicrës, përfshirë SVP-në, është unanimisht kundër iniciativës, duke paralajmëruar se kjo do të kërcënonte stabilitetin kombëtar, do të dëmtonte ekonominë dhe do të dëmtonte prosperitetin zviceran.
Shumica të qarta në të dyja dhomat e parlamentit kanë rekomanduar gjithashtu refuzimin e propozimit, ashtu si edhe Konfederata Zvicerane e Sindikatave, Shoqata Zvicerane e Punëdhënësve dhe Economiesuisse, grupi kryesor ombrellë i organizatave të biznesit në vend.
Sondazhet e fundit tregojnë se fushata kundër propozimit ka fituar terren që nga njoftimi i referendumit në shkurt, por shumica e sondazheve tregojnë për një garë të ngushtë, me kampin “jo” që parashikohet të fitojë me rreth 52% të votave. Për të kaluar, iniciativa duhet të fitojë si votën popullore ashtu edhe shumicën e 23 kantoneve të plota dhe gjashtë gjysmë kantoneve të Zvicrës.
Rezultatet pritet të dihen deri në mesditë ose të dielën pasdite.
