Sipas raportimeve të mediave ndërkombëtare, Roberto Martinez nuk pritet të rinovojë kontratën me Portugalinë, e cila përfundon në fund të korrikut. Pavarësisht ecurisë së luzitanëve në Botëror, tekniku spanjoll pritet të japë dorëheqjen, duke mbyllur një cikël trevjeçar në krye të kombëtares.
Portugalia nis rrugëtimin në Kampionatin Botëror me sfidën ndaj Republikës Demokratike të Kongos, ndërsa vëmendja është e përqendruar te Cristiano Ronaldo, për të cilin ky mund të jetë shansi i fundit për të fituar Kupën e Botës.
Gjatë drejtimit të Martinez, Portugalia ka regjistruar 70% fitore, përqindja më e lartë në historinë e kombëtares, ndërsa triumfoi edhe në Ligën e Kombeve në vitin 2025. Tashmë, para largimit të mundshëm, 52-vjeçari synon të shkruajë historinë duke udhëhequr Portugalinë drejt titullit të parë kampion bote.
