Deputetja e Partisë Demokratike, Jorida Tabaku, ka reaguar pas prezantimit të Indeksit të Biznesit 2025 nga Dhoma Amerikane e Tregtisë, i cili tregon një rënie të ndjeshme të klimës së biznesit dhe besimit të sipërmarrjes në Shqipëri.
Sipas të dhënave të raportit, treguesit kryesorë ekonomikë kanë pësuar përkeqësim, ndërsa indeksi i përgjithshëm ka zbritur në nivelin më të ulët të regjistruar prej shumë vitesh, duke reflektuar sfida në funksionimin e tregut dhe ambientin e investimeve.
“Kur ekonomia mbështetet tek përjashtimet, favorizimet dhe përqendrimi i tregut në pak operatorë, kjo sjell deformim të konkurrencës, rritje të korrupsionit dhe largim të investimeve produktive. Në këto kushte, ekonomia bëhet gjithnjë e më pak konkurruese dhe humbet aftësinë për zhvillim të qëndrueshëm. Ky indeks duhet parë si një sinjal i fortë alarmi për situatën ekonomike në vend,” u shpreh Tabaku.
