Kanë dalë detaje të reja lidhur me incidentin me armë zjarri të ndodhur në Podujevë, ku katër persona mbetën të plagosur.
Policia e Kosovës ka bërë të ditur se i dyshuari për ngjarjen është arrestuar, ndërsa hetimet për zbardhjen e plotë të rrethanave vijojnë.
Sipas informacioneve paraprake, tre nga të plagosurit dyshohet se janë familjarë të autorit të dyshuar, ndërsa personi i katërt mendohet të ketë qenë kalimtar i rastit dhe të jetë plagosur gjatë incidentit.
Të lënduarit u transportuan në Qendrën Klinike Universitare të Kosovës (QKUK), ku po marrin trajtim mjekësor.
Ndërkohë, autoritetet po punojnë për të sqaruar motivin dhe dinamikën e ngjarjes.
Policia njoftoi se sinjalizimi për të shtënat me armë zjarri u mor rreth orës 13:30, ndërsa forcat policore ndërhynë menjëherë në vendngjarje, duke vënë nën kontroll situatën dhe arrestuar të dyshuarin.
