Një ditë pasi presidenti Meta dekretoi datën 6 mars për mbajtjen e zgjedhjeve të pjesshme lokale në 6 bashki të vendit, është mësuar edhe emri i kandidatit të parë të Partisë Socialiste në këto zgjedhje.
“News24” raporton se socialistët do të kandidojnë në këtë qark Emirjana Sakon. Ndërkohë, pritet të nisë mbledhja e Kryesisë së PS në Durrës për të prezantuar kandidaten Sako. Mësohet se Emirjana Sako ka marrë edhe mbështetjen e kryeministrit Edi Rama për të kandiduar për kryetare bashkie në Qarkun e Durrësit.
Sako është aktualisht kryetare e komanduar e Bashkisë së Durrësit, ndërsa për disa mandate ajo ka mbajtur detyrën e drejtoreshës së Shërbimeve Publike në këtë bashki. Sako ka menaxhuar edhe periudhën pas tërmetit të 26 nëntorit në Durrës.
Kujtojmë se Bashkia e Durrësit është pa kryetar që prej fundit të nëntorit 2019, pasi kryebashkiakja e asaj kohe, Valbona Sako, dha dorëheqjen, vetëm disa muaj pasi kishte marrë postin.
