Zgjedhjet e pjesshme lokale u mbyllën. Pa incidente dhe kontestime me fakte dhe prova, por retorikë, Partia Demokratike pranoi humbjen. Fituesit e mëdhenj janë Edi Rama dhe Sali Berisha. Socialistët fituan pesë nga gjashtë bashkitë; Dibër, Lushnje, Durrës, Rrogozhinë dhe Vorë me shumicë dërrmuese, por pengu i madh është Shkodra.
Në karrierën politike Edi Rama ka arritur që të marrë gjithçka, por jo drejtimin e Shkodrës. “Kështjella” mbeti blu edhe në ditët e saj më të vështira, të përçarjes dhe ndasive të mëdha.
Një dorë ia dha edhe LSI, por pa i hequr meritën ish-deputetit Bardh Spahia. Me Shkodrën në “xhep” dhe vendin e dytë në katër nga pesë bashkitë e tjera, misioni i koalicionit “Shtëpia e Lirisë” mund të quhet i përmbushur.
Këto zgjedhje konfirmuan koalicionin e Sali Berishës si grupimin e parë opozitar. Partia Demokratike zbriti në vendin e tretë. Për fatin e tyre të mirë nuk kishte të tjerë në garë, pasi ndoshta mund të ishte edhe më poshtë.
Kandidatët që Lulzim Basha u besoi morën një rezultat zhgënjyes. Por sërish Basha nuk pranoi që të japë dorëheqjen duke gjetur disa justifikime, që për n/kryetarin Agron Gjekmarkaj nuk “pinë ujë”. Sytë tashmë janë te selia blu që po rrudhet akoma më shumë.
/5pyetjet.al
