Si pjesë e buxhetit të tij të propozuar për vitin e ardhshëm fiskal, presidenti amerikan, Joe Biden, publikoi të hënën një normë të propozuar minimale të tatimit mbi të ardhurat që zbatohet për amerikanët me fitimet më të larta. Kjo shënon herën e parë që Shtëpia e Bardhë ka vënë në shënjestër drejtpërdrejt pasurinë e miliarderëve.
I publikuar të hënën, Tatimi Minimal i të Ardhurave të Miliarderëve në buxhetin e propozuar të Bidenit për vitin 2023 do të vendosë një normë tatimore minimale prej 20% për të gjitha familjet amerikane që kanë një pasuri me vlerë më shumë se 100 milionë dollarë – duke ndikuar në 0.01% të amerikanëve më të pasur.
Megjithëse investimet kanë shmangur prej kohësh taksat, propozimi do të llogarisë vlerësimin në vlerë të investimeve të një miliarderi – si aksionet dhe obligacionet – si të ardhura edhe nëse asetet nuk shiten.
Çdo taksë shtesë e paguar për fitimet e parealizuara do të llogaritet në taksat mbi fitimet kapitale që i detyrohen kur miliarderët shesin asetet me një fitim, njoftoi Shtëpia e Bardhë.
Sipas planit, taksat do të arrinin rreth 361 miliardë dollarë gjatë dekadës së ardhshme, me më shumë se gjysmën e të ardhurave që vijnë vetëm nga miliarderët.
“Kodi tatimor aktualisht ofron trajtim të veçantë për llojet e të ardhurave që gëzojnë njerëzit e pasur” tha Biden.
“Për të adresuar përfundimisht këtë problem të dukshëm, Buxheti përfshin një taksë minimale prej 20% për multimilionerët dhe miliarderët, të cilët shpesh paguajnë norma taksash jashtëzakonisht të ulëta”.
Mospagimi i taksave
Sipas Thesarit, 1% më i lartë i taksapaguesve, të renditur sipas të ardhurave, nuk kanë paguar rreth 163 miliardë dollarë taksa vitin e kaluar, duke përbërë rreth 28% të totalit të taksave të papaguara.
Amerikanët më të pasur përbëjnë pjesën më të madhe të evazionit fiskal, sepse taksapaguesit me të ardhura më të larta kanë burimet financiare për të “përfituar nga shërbimet e kontabilistëve dhe përgatitësve të taksave, të cilët i ndihmojnë ata të mos mbajnë detyrimin e tyre të vërtetë të tatimit mbi të ardhurat”, njoftoi Thesari në shtator.
