Miliarderi rus Roman Abramovich thuhet se po kërkon hua nga miqtë e tij të pasur dhe të fuqishëm në Hollywood, Wall Street dhe industrinë e teknologjisë, në mënyrë që të jetë në gjendje të paguajë stafin e tij, pasi llogaritë e tij në SHBA dhe Britani janë ngrirë.
Biznesmeni rus u kërkon miqve të tij në SHBA që t’i japin hua nga 1 milion dollarë secili, pasi vetëm pagat e stafit të tij thuhet se arrijnë në 750,000 dollarë në javë. Siç u tregon të njohurve, nuk i ka vonuar asnjëherë rrogat e njerëzve që punojnë tek ai, por me llogaritë e bllokuara nuk i kryen dot pagesat.
Megjithëse Abramovich herë pas here ka pritur shumë njerëz të famshëm dhe të fuqishëm në varkat e tij dhe në vilën e tij të madhe verore në St Barth, shumë prej tyre hezitojnë t’i japin para, duke qenë se ai është nën sanksione, pavarësisht rolit të tij në negociatat për armëpushimin në Ukrainë.
Mes shumë njerëzve me të cilët thuhet se u është afruar janë producenti dhe regjisori hollivudian Brett Ratner dhe familja Rothschild. Ata janë të gjithë miq të mirë, por askush nuk pranoi t’i jepte para, ose sepse nuk kanë aq para në dorë ose sepse nuk duan të merren me drejtësinë.
55-vjeçari Abramovich ka një pasuri prej 14.3 miliardë dollarësh. Ai zotëron të paktën katër varka me një vlerë totale prej 1.4 miliardë dollarë dhe një pronë prej 700 milionë dollarësh në plazhin më të bukur të St Barth, plazhin Gouvenour.
