Policia ka dhënë detaje rreth aksidentit të shkaktuar nga ministrja e Industrisë së Kosovës, Rozeta Hajdari, të dielën në rrugën “Vicianum” të Prishtinës.
Në raportin 24 orësh, policia i referohet Hajdarit si “e dyshuara femër kosovare” e cila kur ishte duke drejtuar makinën, ka goditur viktimën mashkull kosovar.
“Viktima ka marrë trajtim mjekësor”, thuhet në raport.
Ndërkohë, mbrëmjen e së dielës, Hajdari ka dalë me një deklaratë në llogarinë e saj në Facebook, duke thënë se teksa po drejtonte makinën, dy fëmijë ishin shfaqur papritur në rrugë, duke shtuar se njëri prej tyre ishte përplasur me veturën e saj.
“Me shqetësim menjëherë kam reaguar, duke i ofruar ndihmë fëmijës dhe kam lajmëruar Policinë të cilët janë marrë me gjithë evidencën e rastit”, ka shkruar ajo ndër të tjera.
