KE mund të përjashtojë Hungarinë dhe Sllovakinë nga një embargo e tregut rus të naftës që po përgatit Komisioni, pasi Brukseli është i kujdesshëm nëse të dy vendet mund të përballojnë një shkëputje të shpejtë.
Komisioni pritet të përfundojë punën të martën për një paketë të gjashtë të sanksioneve të BE-së kundër Rusisë për pushtimin e saj në Ukrainë, e cila do të përfshijë ndalimin e blerjes së naftës ruse, eksportet e së cilës janë një burim kryesor i të ardhurave për Moskën.
Hungaria, e cila është shumë e varur nga nafta ruse, ka deklaruar vazhdimisht se nuk do të nënshkruajë sanksione në sektorin e energjisë. Sllovakia është gjithashtu një nga vendet e BE -së më të varura.
Për të mbajtur bllokun 27-vendesh të bashkuar, komisioni mund t’i ofrojë Sllovakisë dhe Hungarisë një “përjashtim ose një periudhë të gjatë tranzicioni”, tha një zyrtar.
Embargoja e naftës ka të ngjarë të zbatohet gradualisht gjithsesi, me shumë gjasa të hyjë në fuqi vetëm në fillim të vitit të ardhshëm, thanë zyrtarët.
Paketa e sanksioneve të BE-së do t’u paraqitet ambasadorëve të BE-së të mërkurën.
