Kryeministri i Kosovës Albin Kurti zhvilloi një bisedë dy orëshe me avokatët e ish pjesëtarëve të UÇK-së, të cilët po gjykohen në Hagë. Në takim po diskutohen kërkesat e bëra nga avokatët për qeverinë e Kosovës.
“Takimi u mbajt si rezultat i nevojës për të diskutuar dhe adresuar kërkesat e bëra nga ekipet mbrojtëse: procesi i stërzgjatur i mbajtjes në paraburgim të të akuzuarve, mos-respektimi i praktikës së Gjykatës Evropiane për të Drejtat e Njeriut, mungesa e përkthimeve dhe, në veçanti, mosmarrja në konsideratë e okupimit dhe krimeve të Serbisë në Kosovë gjatë viteve të ’90-ta”, thuhet në njoftimin e zyrës së kryeministrit.
Kurti propozoi që të bëhen takime të rregullta ndërsa ekipet u shprehën mirënjohëse për interesin që po tregon qeveria e Kosovës./Ekspres
