Ministri i Mbrojtjes, Niko Peleshi, i pyetur në lidhje me një kërkesë të bërë nga Shqipëria pranë kompanisë amerikane “Lockheed Martin” në lidhje me një porosi për raketa moderne antitank “Javelin” tha se po blejmë anti-tankun më të mirë në botë.
“Është në kuadrin e modernizimit të Forcave të Armatosura, rritjes se kapaciteteve tona që Shqipëria ka ne raport me NATO-n. Është e vërtetë që ne kemi porosinë tonë aty si pjesë e rrugëtimit tonë të rritjes së kapaciteteve të FA-së, rritjes së sigurisë dhe mbrojtjes së integritetit territorial të vendit tonë.
Nuk është se ka lidhje me ndonjë kërcënim që të mos krijojmë panik, ne jemi një vend në NATO e kemi zgjidhur çështjen e sigurisë kombëtare, jemi një vend i mbrojtur. Ne do të vazhdojmë të ndjekim ritmin e NATO-s për t’u forcuar si pjesë e një aleance mbrojtëse.
Theksoj se NATO nuk është kërcënim për botën, as për Rusinë e as për Rajonin sepse nuk ka për qellim të sulmojë, por ka për qëllim të garantojë mbrojtjen e vet”, tha Niko Peleshi.
Sa raketa janë blerë, në çfarë vlere dhe a është bërë publike kontrata?
“Unë po e bëj publike nëpërmjet kësaj deklarate, nuk është çudi pasi ne kemi edhe shumë procese dhe blerje të tjera nga partneri ynë strategjik, nuk e çmoj me vend që në këtë moment të flas për shifra, por bëhet fjalë për një sistem të ri, që është më i miri në botë” tha ai.
Fillimisht, njoftimi u bë nga kompania amerikane që prodhon këto armatime, “Lockheed Martin”. Sipas saj, kompania ka marrë një porosi nga Pentagoni prej 309 milionë dollarësh për prodhimin e mbi 1300 antitankeve të tillë, me fondet e siguruara nga ligji i miratuar së fundmi në SHBA për ndihma ushtarake ndaj Ukrainës, por edhe porosi nga disa shtete, si Shqipëria, Norvegjia, Letonia dhe Tajlanda.
“Po punojmë shumë për të realizuar porositë”, tha Dave Pantano, zv.presidenti i departamentit të prodhimit të sistemit Javelin. Këto raketahedhës mbahen në shpatull nga ushtarët dhe peshojnë rreth 20 kg. Sipas Lockheed Martin, ato janë një rreze që arrin deri në 4 kilometra.
Këto armë janë bërë pjesë vendimtare e luftës në Ukrainë, të përdorura gjerësisht nga trupat vendase për të zmbrapsur sulmin e ushtrisë ruse në disa rajone, duke shkatërruar tanket e forcave armike. Deri tani, Ukraina ka marrë më shumë se 5500 raketahedhës të tillë dhe vendet aleate janë zotuar të dërgojnë edhe më shumë.
