Deputeti i Partisë Demokratike, Luan Baçi, i ftuar në “5 Pyetjet nga Babaramo”, foli për situatën në të cilën ndodhen sot partia në të cilën ai është pjesë.
Këtë të hënë, Partisë Demokratike iu hoq e drejta për të votuar në Kongresin e Partisë Popullore Europiane që do të mbahet në Roterdam, por Luan Baçi theksoi se PD nuk është e izoluar, pasi sipas tij nuk mund të izolohen me mijëra demokratë. Sa i përket qëndrimit të ndërkombëtarëve ndaj Sali Berishës, Baçi tha se ata do të reflektojnë, në të kundërt, tha ai, të gjenden prova nëse ka dhe t’i jepet dënimi.
“Duket sikur PD është e izoluar, por nuk është kështu. Kryesia nuk është se e zgjidhi krizën pasi është pjesë e procesit. Ka krizë dhe ne nuk e fshehim. PD po kalon një proces të gjatë dhe shumë të vështirë. Nuk kemi qenë kështu as në vitin 1997. Megjithatë, aktualisht demokratët janë të gjithë bashkë, demokratët vazhdojnë punën. PD do të ngrihet në nivelin që kërkojnë qytetarët.
Partitë europiane nuk kanë izoluar PD-në. Nuk mund të izolohen me mijëra demokratë. Me fjalë po, por me vepra jo. Jam i bindur që edhe ndërkombëtarët do të reflektojnë. Në të kundërt t’i japin dënimin zotërisë”, tha Baçi.
