Nga Dylber Balla
Ministria e Turizmit dhe Mjedisit nuk ka asnjë informacion dhe dijeni për idenë që kanë riaktivizuar grekët, konkretisht bashkia e Korfuzit për të marrë me tubacion nëndetësor ujin nga Syri i Kaltër.
I kontaktuar nga “5pyetjet.al” zëdhënësi i shtypit të ministrisë, Erjon Uka tha se nuk ka dijeni. “Aktualisht nuk kemi asnjë dijeni zyrtare, vetëm lajmet që kemi parë në media” tha ai.
Edhe kryetari i bashkisë së Finiqit, Kristo Kiço deklaroi për “5pyetjet.al” se nuk ka dijeni, por shtoi se ideja është e vjetër.
“Nuk kam asnjë dijeni. Para një ore po shikoja telefonin dhe po lexoja reagimin e deputetes së PD-së dhe pashë diçka. Por nuk ka ndonjë gjë.
Nuk më ka informuar askush as nga Korfuzi as nga qeveria shqiptare, nuk kam asnjë informacion. Mbase është një dëshirë e kryetarit të bashkisë së Korfuzit. Nuk e di nëse është biseduar në nivel të lartë.
Kjo si ide është dëgjuar para viteve 2000, ‘95 mbaj mend pastaj jo më. E kanë lënë në heshtje” tha ai.
Por cili do të ishte vendimi i tij, nëse i hapet rruga projektit?
“Nuk është bashkia autoriteti që vendos. Kjo i tejkalon kompetencat e pushtetit lokal. Nuk besoj se duhet firma ime, ujerat janë pronë e shtetit, jo pushtetit vendor.
Ajo do të vendoset nga specialistët nëse nuk krijon probleme. Duhet studiuar. Nuk e di cfarë të them” tha Kiço.
Bashkia e Korfuzit ka rikthyer pas 40 vitesh idenë e furnizimit me ujë nga Shqipëria. Sytë i ka drejtuar te Syri i Kaltër.
Lajmi ka disa javë që qarkullon në ishullin e Korfuzit, por në Shqipëri “mbërriti” mbrëmjen e djeshme duke u përhapur me shpejtësi.
Disa prej mediave greke kanë publikuar edhe detaje të një projekti të vjetër që shkon gati 40 milionë euro.
