Sekretari për emigracionin në PD, Endrit Hoxha ka denoncuar një ngjarje të ndodhur në ambasadën shqiptare në Athinë, ku sipas tij PS po mban takimet elektorale.
Kjo është një shkelje e etikës dhe përdhosje e shteti, kjo sipas PD-së pasi në ambasadë janë futur flamuj të Partisë Socialiste.
“Informacione të konfirmuara, ardhur në Partinë Demokratike, bëjnë me dije për organizimin e një takimi të brendshëm partiak në mjediset e përfaqësisë diplomatike shqiptare në Athinë.
Duke shkelur çdo ligj të shtetit dhe kod të etikës, zyrtarë të lartë të PS kanë kryesuar të shtunën në një takim organizativo-elektoral, brenda zyrave ku stema është e Republikës së Shqipërisë.
Futja aty e flamujve dhe simboleve partiakë është mjerim dhe përdhosje e idesë së shtetit.
Përvetësimi i simboleve kombëtare, hapësirave shtetërore, dhe devijimi i vullnetit të taksapaguesve shqiptarë për qëllime partiake, është një rekord i zi që nuk i bën nder shtetit dhe as një PS-je normale,” është shprehur ai.
Po ashtu PD ka ngritur një tjetër akuzë, ku sipas saj PS ka përfshirë një ushtarak Roland Berxhani, si koordinator për zgjedhjet në degën e PS në Athinë.
“Përfshirja e një zyrtari, aq më shumë një atasheu ushtarak në punë partiake, cenon jo vetëm dinjitetin e Forcave të Armatosura të një vendi të NATO-s, por ul kredibilietin e ambasadës dhe shtetit shqiptar te bashkatdhetarët tanë atje.
Kthimi i Ambasadës në zyrë me aneks të Partisë Socialiste është një atentat tjetër që partia në pushtet i bën shtetit dhe imazhit të Shqipërisë,” ka përfunduar Hoxha.
