Në maj të këtij viti një grup i doktorëve hapën Spitalin Gjeneral “Biocell Hospital” në Beograd. Sipas mediave serbe, vëllai i kryeministrit Dritan Abazoviç, Xhihan Abazoviç është pronar i spitalit në të cilin punon edhe partnerja e kryeministres serbe Ana Brnabiç, Milica Gjurgjiç shkruan Blic.
Xhihan Abazoviç, që me profesion është mjek, ka konfirmuar se Milica Gjurgjiç, është e punësuar në spital si shefe e repartit të Radiologjisë.
Ai tha se ishte i befasuar me shkrimet e mediave dhe senzacionin që i është dhënë se vëllai i tij Dritan Abazoviç është kryeministër në shtetin fqinj dhe partnerja e kryeministres Brnabiç është shefe e Radiologjisë.
Xhihan Abazoviç, ka thënë se spitali është rezultat i punës së gjatë të gjashtë apo shtatë njerëzve. Ai ka shtuar se ka pasur një spital në Zemun në vitin 2015 por që është mbyllur për shkak të spitalit të ri që është hapur në pjesën e Beogradit të ri.
