Anija Razoni me flamurin e Sierra Leone, me 26 mijë tone grurë, është larguar nga porti i Odesës, me destinacion Libanin. Kjo është anija e parë që del nga Ukraina me drithë që nga fillimi i pushtimit rus.
“Ukraina së bashku me partnerët tanë ka ndërmarrë një hap tjetër sot në parandalimin e urisë në botë”, tha ministri i infrastrukturës i Ukrainës, Oleksandr Kubrakov në një deklaratë të hënën.
Kubrakov theksoi se Ukraina kishte bërë gjithçka për të rikthyer aktivitetin në portet dhe se heqja e bllokadës do t’i jepte ekonomisë së Ukrainës 1 miliard dollarë të ardhura nga këmbimi valuator.
Ministri i infrastrukturës i Ukrainës tha se 16 anije të ngarkuara ishin bllokuar në portet e Ukrainës që nga fillimi i pushtimit rus dhe se ata planifikonin që portet të rifitonin kapacitetin e plotë të transportit në javët e ardhshme.
Rusia pranoi të lejojë anijet e grurit të largohen nga Ukraina dhe të mos i sulmojë ato në një marrëveshje që u nënshkrua më 22 korrik në Stamboll. Por më pak se 24 orë më vonë, vërtetësia e marrëveshjes u vu në dyshim kur forcat ruse goditën portin e Ukrainës, Odesa.
Kur u pyet nga ministri i mbrojtjes i Turqisë, Rusia në fillim mohoi se ishte e përfshirë në sulm. Por të nesërmen ajo publikoi një deklaratë duke thënë se kishte goditur një anije ukrainase që mbante armë perëndimore e cila ishte në port. Autoritetet e Ukrainës hodhën poshtë shpjegimin e Rusisë./The Guardian
