Ditën e sotme pritet në Prishtinë Gabriel Escobar.
Të paktën kështu konfirmoi zëdhënësi i Departamentit amerikan të Shtetit, Ned Price, në një konferencë për media.
Por ndryshe nga sa pritej Escobar nuk do të takojë kreun e ekzekutivit, Albin Kurti. Kështu ka konfirmuar për T7 zëdhënësi i Qeverisë, Përparim Kryeziu.
Por, Escobar do të pritet nga presidentja e vendit, Vjosa Osmani. Gjithashtu do të ketë darkë pune me krerët e partive opozitare.
Vizita e Escobarit dhe Lajçakut vjen pas dështimit të arritjes së ndonjë marrëveshje mes Kosovës dhe Serbisë në takimin e 18 gushtit.
Pas takimit pesëorësh, Përfaqësuesi i Lartë i BE-së, Josep Borrell, tha se negociatat e asaj dite nuk rezultuan me një marrëveshje, por shpresonte se do të kishte takim tjetër, para 1 shtatorit.
Një shtatori është data, të cilën Qeveria e Kosovës e ka caktuar për hyrje në fuqi të vendimit të saj për targat e lëshuara ilegalisht nga Serbia.
