Një 19-vjeçar është arrestuar ditën e sotme në Sarandë pasi u kap duke transportuar 8 emigrantë të paligjshëm.
Specialistët e Seksionit për Hetimin e Krimeve në Komisariatin e Policisë Sarandë, në bashkëpunim me shërbimet e tjera të Komisariatit Sarandë, në vijim të punës për goditjen e aktivitetit kriminal të dhënies ndihmë shtetasve të huaj, për kalim të paligjshëm të kufirit, kundrejt fitimit, në bazë të informacioneve policore, kanë organizuar dhe finalizuar me sukses operacionin policor “Pal”, si rezultat i të cilit u arrestua në flagrancë shtetasi B. M., 19 vjeç, banues në Durrës.
Arrestimi i këtij shtetasi u bë pasi, në aksin rrugor Çukë-Fanar, në vendin e quajtur “Pal”, u kap në flagrancë nga shërbimet e Policisë duke transportuar me automjetin e tij “Benz”, 8 emigrantë të paligjshëm, kundrejt fitimit.
Materialet i kaluan Prokurorisë pranë Gjykatës së Shkallës së Parë Sarandë, për veprën penale “Ndihma për kalim të paligjshëm të kufijve”.
