Vdekja e Mbretëreshës Elizabeth II shënon fundin e një epoke si monarkja më jetëgjatë në historinë e Mbretërisë së Bashkuar, por trashëgimia e saj do të vazhdojë të frymëzojë breza të tërë.
Me këtë mesazh presidentja e Kosovës Vjosa Osmani ka shprehur ngushëllimet për ndarjen nga jeta të monarkes më jetëgjatë në histori.
Në mesazhin e saj Osmani thekson ndihmën e Mbretërisë së Bashkuar ndaj Kosovës në ditët më të errëta dhe sot ndjen humbjen e madhe të britanikëve.
Mesazhi i Vjosa Osmanit:
Qytetarët e Republikës së Kosovës, krahas miliona njerëzve anë e mbanë botës, janë thellësisht të pikëlluar nga lajmi për ndarjen nga jeta të Lartmadhërisë së Saj, Mbretëreshës Elizabeta II.
Vdekja e Lartmadhërisë së Saj shënon fundin e një epoke si monarkja më jetëgjatë në historinë e Mbretërisë së Bashkuar, por trashëgimia e Elizabetës së Madhe do të vazhdojë të frymëzojë breza të tërë.
Populli i Mbretërisë së Bashkuar na erdhi në ndihmë në ditët tona më të errëta, ndaj sot ne bashkëndjejmë me zemër të rënduar për këtë humbje të madhe së bashku me Familjen Mbretërore dhe të gjithë qytetarët e Mbretërisë së Bashkuar.
U prehtë në paqe Lartmadhëria e Saj!
