Kryeministri britanik Keir Starmer po përballet me një nga momentet më kritike të karrierës së tij politike dhe ndoshta ditën më kritike të mandatit të tij si kryeministër.
Mbledhja e kabinetit sot, e martë, konsiderohet një provë kritike, pasi Partia Laburiste duket thellësisht e përçarë dhe një pjesë e saj po sfidon drejtpërdrejt lidershipin e tij.
Britania ka pasur katër kryeministra në katër vjet dhe tani një tjetër duket se është në “buzë të humnerës”. Partia e tij është në trazira dhe anëtarët e kabinetit janë të ndarë nëse ai duhet të qëndrojë në pushtet.
Starmer dhe mbështetësit e tij këmbëngulin se do të ishte “e paarsyeshme”, siç thonë ata, të çonin partinë, qeverinë dhe vendin në një proces të zgjatur ndryshimi të lidershipit me një rezultat të pasigurt.
Megjithatë, rritja e vazhdueshme e numrit të deputetëve që kërkojnë dorëheqjen e tij krijon një realitet politik mbytës .
Me një titull satirik, Daily Star kap atmosferën e krijuar për qeverinë laburiste nën drejtimin e Starmer: “I dashur kryeministër, me urdhër të tradhtarëve… ju jeni vrarë”.
Shumë deputetë janë hapur të shqetësuar se Starmer nuk është popullor me një pjesë të madhe të elektoratit, në një kohë kur Partia Laburiste po përpiqet të ndalë ngritjen e Reform UK.
Tensioni brenda partisë po përshkallëzohet, ndërsa kampe të ndryshme shkëmbejnë akuza për shkaqet e krizës.
Ndërsa deputetë të tjerë të Partisë Laburiste po e ndjekin me shqetësim shembjen e brendshme dhe janë në gjendje shoku nga imazhi i çorganizimit që po shfaq partia.
Numrat kryesorë të ditës:
Të paktën 72 deputetë të Partisë Laburiste i kanë bërë thirrje publikisht Starmer që ose të japë dorëheqjen menjëherë ose të përcaktojë një afat kohor për dorëheqjen e tij. Kjo përfaqëson më shumë se 17% të 403 deputetëve të partisë.
Gjashtë këshilltarë parlamentarë të ministrave, të cilët gjithashtu iu bashkuan publikisht thirrjeve për dorëheqjen e kryeministrit, u zëvendësuan vonë mbrëmë nga Downing Street.
Deputetja laburiste Catherine West njoftoi se po mbledh emrat e kolegëve që po bëjnë thirrje që Starmer të japë dorëheqjen deri në shtator.
Më parë ajo kishte kërcënuar se do të niste një proces të brendshëm ndryshimi të lidershipit nëse nuk do të kishte kundërshtim nga një ministër.
Për ta bërë këtë, asaj i duhet mbështetja e 20% të deputetëve të Partisë Laburiste — domethënë, 81 deputetë.
