Policia e Shtetit ka reaguar 24 orë pas atentatit që ndodhi mesditën e djeshme në Durrës. Në media u raportua se shënjestër e atentatit ishte Akil Nerjaku.
Policia thotë se atentati ndodhi dje orës 12:00 në rrugën “Pavarësia” dhe nuk e përfshinë Nerjakun.
Sipas bluve është qëlluar një herë me armë zjarri në drejtim të një automjeti të parkuar, në pronësi të B. A., 52 vjeç, banues në Maqedoninë e Veriut.
Në momentin e të shtënës me armë, në automjet nuk ka qenë asnjë person.
Policia thotë se është bërë i mundur identifikimi i automjetit me të cilin ka lëvizur personi që ka qëlluar në drejtim të automjetit të parkuar.
“Vijon puna intensive për kapjen e autorit. Për arsye hetimi, nuk bëjmë me dije të dhëna të tjera” thotë policia.
Grupi hetimor, nën drejtimin e Prokurorisë pranë Gjykatës së Rrethit Gjyqësor Durrës, vijon punën për zbardhjen dhe dokumentimin e plotë të rrethanave të ngjarjes.
