Sot hakerat, faqja ‘Homeland Justice’ që sipas qeverisë shqiptare është e sponsorizuar nga Irani ka publikuar të dhënat për ish-drejtorin e Policisë së Shtetit, Gledis Nano.
Në “shesh” janë të gjitha hyrje-daljet e tij të regjistruara në sistemin TIMS si dhe fotot e tij ndër vite.
Po ashtu janë publikuar të dhënat personale, pasaportat e tij ndër vite si edhe patenta. Mes mijërave e-mail-eve që janë publikuar në rrjet janë edhe të dhënat për shqiptarët që ndodhen në kampet e ISIS në Siri.
Në një prej e-mail-eve që kanë dalë në media është edhe lista me 35 fëmijët shqiptarë që janë në kampet e “ferrit”.
Disa prej tyre janë riatdhesuar, por ende edhe shumë të tjerë janë atje. “5pyetjet.al” e disponon listën me emrat, fotot dhe të dhënat e të gjithë fëmijëve por për arsye etike vendosi të mos i publikojë.
