Pas më shumë se 12 orësh policia është bërë e “gjallë” duke reaguar për pengmarrjen mbrëmjen e djeshme.
Indrit dhe Gentian Beqiraj u përfshinë në një konflikt. Pas sharjeve, ofendimeve dhe rrahjes, Indrit Beqiraj u mor peng nga katër persona për disa minuta.
Por si ndodhi ngjarja?
Policia thotë se ngjarja ndodhi në autostradën Durrës-Tiranë, në vendin e quajtur “Koxhas”. Dy vëllezërit ishin duke udhëtuar me motor.
Të rinjtë dyshohet se janë përfshirë në një incident rrugor, pasi një automjet ka goditur motorin e tyre, i cili për pasojë ka dalë nga rruga.
Për këtë shkak, sipas policisë dy vëllezërit janë konfliktuar fizikisht me personat që ishin në automjet.
Në konflikt e sipër, personat që ishin në automjet, dyshohet katër që janë identifikuar kanë marrë njërin prej vëllezërve, Indritin të cilin e kanë lënë në rrugë, larg nga vendi i konfliktit, dhe më pas janë larguar.
Bazuar te dëshmitë e dy vëllezërve dhe kamerat e sigurisë, policia ka identifikuar dhe po punon për kapjen e autorëve.
