Mundësia e një konflikti mes Turqisë dhe Greqisë duket e mundshme nëse gjykohet nga retorika nxitëse e Rexhep Tajip Erdogan, aleatëve të tij, shtypit proqeveritar, por edhe nga deklaratat edhe të opozitës, vlerëson një analist amerikan.
Ryan Gingeras, profesor në Shkollën Pasuniversitare Detare të Marinës së SHBA në Kaliforni, ekspert i historisë së Perandorisë Osmane të vonë dhe autor i pesë librave mbi Turqinë dhe artikujve të shumtë në NY Times, Foreign Affairs dhe botime të tjera, përpiqet të analizojë rreziqet dhe arsyet pse Erdogan do të rrezikonte një luftë me Greqinë në të ardhmen e afërt.
“Ka shumë arsye për të vënë në dyshim seriozitetin e kërcënimeve të Erdoganit. Një shumicë e ngushtë e votuesve turq, sipas një sondazhi, mbeten të bindur se fjalët e tij janë thjesht një strategji zgjedhore për të “krijuar një axhendë” përpara zgjedhjeve të vitit të ardhshëm. Një përqindje akoma më e madhe, 64%, nuk besojnë se ka “armiqësi mes popullit turk dhe atij grek.
Dhe ka edhe më pak dyshime se një konflikt midis Greqisë dhe Turqisë do të kishte një ndikim shkatërrues në ekonomitë e brishta të të dyjave. Të ardhurat nga turizmi, veçanërisht në qytetet bregdetare në bregdetin e Egjeut, përbëjnë rreth 18% të GNP-së së Turqisë (dhe rreth 18% të Greqisë). Të dy vendet varen shumë nga tregtia në det.
Përveç dëmeve të mundshme ekonomike, pasojat ndërkombëtare të konfliktit nuk do të ishin më pak të rënda. Si SHBA ashtu edhe BE kanë sinjalizuar mungesë tolerance për çdo sulm ndaj territorit sovran grek. Përkundrazi, as Brukseli dhe as Uashingtoni nuk duket se kanë durim për pretendimet turke për agresion grek”, shkruan analisti.
