Tetë të burgosur iranianë në burgun e Evinit kanë mbetur të vdekur si pasojë e një zjarri, i cili kaploi institucionin e sigurisë në Teheran, të shtunën e 15 tetorit.
Kështu kanë bërë me dije autoritetet iraniane në rrugë zyrtare, dy ditë pas ngjarjes që rroku vëmendjen e gjithë botës.
Në Teheran, por edhe në qendra të tjera të mëdha të banuara të Iranit, javët e fundit, ka pasur protesta të shtuara lidhur me vrasjen e një 22-vjeçareje të quajtur Mahsa Amini, e cila u dhunua brutalisht nga Policia Morale e Iranit, pasi nuk kishte veshur në mënyrë korrekte shaminë.
Në vazhdën e këtyre protestave, ka pasur edhe të tjera të shtuara, nga familjarët e të burgosurve në Evin, ku vuajnë dënimet të dënuar politikë, gazetarë apo opozitarë iranianë.
Familjet e të burgosurve, duke përfshirë disa nga disidentët politikë të profilit më të lartë në Iran, thanë se numri i vërtetë i të vdekurve ka të ngjarë të jetë më i lartë dhe akuzuan zyrtarët e sigurisë për ndezjen e zjarrit dhe përdorimin e gazit lotsjellës.
Një grup i vogël anëtarësh të familjes, duke kërkuar përgjigje për vendndodhjen e të afërmve të tyre të burgosur, u lejuan përfundimisht të hynin në burg për t’i takuar.
