Kreu i grupit parlamentar të PD-së, Enkelejd Alibeaj ka reaguar ndaj arrestimeve të SPAK për aferën e inceneratorëve të Fierit.
Ai ka treguar se SPAK nuk i ka dërguar deri në fund hetimet pasi në aferë janë të përfshirë ministra dhe kryetar bashkie.
Alibeaj ka theksuar se besimi i qytetarëve te drejtësia është i ulët nëse nuk ndëshkohen dhe zyrtar të lartë shtetërorë.
“Hetimet dhe vendimet e deritanishme të Spak janë të pamjaftueshme dhe sipërfaqësore. PD ka denoncuar me fakte konkrete aktet korruptive të inceneratorëve, ministrat dhe kryetarët e bashkive të përfshirë në këtë aferë.
Sikundër është e qartë për të gjithë, përfshirë dhe institucionet e heshtura të drejtësisë se arrestimet e sotme janë vetëm një pikë në oqeanin e korrupsionit të inceneratorëve ku janë të zhytur ministra dhe kryeministri.
Pa u ndëshkuar përgjegjësit e vërtetë, besimi i qytetarëve tek drejtësia do mbetet i ulët. Vetëm çuarja deri në fund e me seriozitet i hetimeve për këtë aferë do rrisë besimin se Spak do të mund të mbrojë interesin e qytetarëve përballë zyrtarëve të lartë dhe të korruptuar!” ka shkruar ai në Twitter.
