“Shtetet e Bashkuara kanë qenë të qarta me Turqinë për rreziqet e operacioneve ushtarake në Sirinë veriperëndimore, megjithëse mbështesin të drejtën e Ankarasë për vetëmbrojtje”, tha sot zëdhënësi i Këshillit të Sigurisë Kombëtare të Shtëpisë së Bardhë , John Kirby.
“Ne nuk duam të shohim operacione ushtarake në veriperëndim të Sirisë që do t’i vënë civilët në rrezik më të madh se sa janë tashmë, do të rrezikojnë trupat dhe personelin tonë në Siri ose misionin tonë për të luftuar Shtetin Islamik”, u tha Kirby gazetarëve.
Turqia ka shtuar bombardimet dhe sulmet ajrore në veri të Sirisë javët e fundit dhe po planifikon një pushtim tokësor kundër militantëve siro-kurdë, të cilët ai i quan terroristë. Kurdët e Sirisë formojnë shtyllën kurrizore të SDF-së, Forcave Demokratike Siriane, të mbështetur nga SHBA.
Shtetet e Bashkuara gjithashtu nuk kanë parë asnjë provë se Irani ka transferuar raketa balistike në Rusi për përdorim kundër Ukrainës, tha sot Shtëpia e Bardhë.
John Kirby, zëdhënësi i Këshillit të Sigurisë Kombëtare të Shtëpisë së Bardhë u tha gazetarëve se SHBA-ja ka përcaktuar se Teherani vazhdon të dërgojë avionë pa pilot, të pilotuar nga distanca në Rusi.
Për industrinë ruse të mbrojtjes, Kirby tha “ne e dimë se po lufton për të vazhduar (prodhimin) me këtë ritëm.” “Ne e dimë se (Presidenti rus Vladimir Putin) ka probleme në rimbushjen e municioneve precize në veçanti.”
