Kreu i PD, Sali Berisha u ndal në një takim me strukturat në Gjirokastër këtë të shtunë, nga ku deklaroi se vendi ynë ndodhet në kushtet e një “monizmi të plotë njëlloj si 32 vite më parë”. Ky monizëm tha kryedemokrati, “bazohet te krimi dhe droga”.
“Por prapë sot, pas 32 vitesh, ne jemi në një monizëm të plotë njëlloj si 32 vite më parë.
Nëse monizmi i 32 viteve më parë bazohej në një doktrinë çnjerëzore të marksizëm-leninizmit, sot ky monizëm nuk është i bazuar më këtë doktrinë.
Ky monizëm është i bazuar në krimin, i cili në disa aspekte tejkalon çdo lloj standardi, është i bazuar në drogën, që në pamje të parë duket sikur sjell dobira, por paraja e drogës është toksike. Asnjë vend nuk është zhvilluar nga krimi dhe droga.
Le të marrim Tiranën sot. Tirana është vendi me treguesin më të lartë të ndërtimeve në Europë. Normalisht, sipas të gjitha ligjeve të tregut, Tirana duhet të kishte çmimet më të arsyeshme të apartamenteve, por ajo i ka të tretat më të shtrenjtat në Europë.
Sepse zoti i tregut nuk është ekonomia që krijuan qytetarët, por narko-eurot. Ky monizëm i dytë ka pasur pasoja katastrofale për vendin. 40 përqind e banorëve të Gjirokastrës janë larguar”, tha Berisha.
