Në Tiranë pasditen e sotme është zhvilluar protesta e studentëve shqiptarë nga Maqedonia e Veriut. Një grup studentësh erdhën në Tiranë të mbështetur edhe nga shumë të rinj në kryeqytet dhe jo vetëm për të kërkuar sensibilizimin e institucioneve shqiptare që të reagojnë për të bërë presion tek Shkupi zyrtar.
“Ajo që nisëm ne po kthehet në një ortek për të zbatuar të drejtën e barabartë për gjuhën shqipe. Nuk kërkojmë privilegje dhe mëshirë, por barazi dhe respekt” tha njëri nga studentët. “Le ta dëgjojnë mirë të gjithë, shqiptarët nuk do të heshtin” tha një tjetër
Kërkesa e studentëve shqiptarë në Maqedoni është për të dhënë provimin e jurisprudencës në gjuhën shqipe. Qeveria në Shkup ka paralajmëruar se shumë shpejt do të miratohen ndryshimet ligjore. Pas mbledhjes dhe fjalimeve në sheshin Skënderbej, marshimi vazhdoi drejt ambasadës së Maqedonisë në Tiranë.
